ته‌فسیری رامان له‌ ماناو مه‌به‌ستی قورئان

له‌نوسینی به‌ڕێز: مامۆستا مه‌لا ئه‌حمه‌د كاكه‌ مه‌حموود - به‌ره‌حمه‌ت بێت

به‌رهه‌می 13 ساڵ شه‌و نخونیی و ماندووبونی مامۆستا له‌ نووسینی ته‌فسیری‌ قورئان به‌زمانی شیرینی كوردیی دوای ئه‌وه‌ی كه‌ مامۆستا توانی زاڵ ببێت به‌سه‌ر ئه‌و هه‌موو ته‌نگ و چه‌ڵه‌مه‌ی كه‌ هاته‌ رێی له‌ نووسینی ئه‌م ته‌فسیره‌دا له‌ ساڵی 1993 وه‌ تا كۆتایی ساڵی 2005 كه‌ ئه‌وه‌نده‌ی ئێمه‌ ئاگامان لێی بووه‌و وه‌ك جه‌نابیشی له‌ پێشه‌كی ته‌فسیره‌كه‌یدا باسی كردووه‌ ، هه‌ر به‌شه‌و له‌ شوێنێك نووسراوه‌ وه‌ك كوردستانی ئێران له‌ شاری مه‌ریوان ، سنه‌ ، پیرانشه‌هر ، خدراوای سه‌ركردایه‌تی باسك ، تاران و كرماشان ، دواتر كوردستانی عێراق له‌شاره‌كانی هه‌ڵه‌بجه‌ی شه‌هیدان ، هه‌ولێر ، دهۆك ، رانیه‌ ، سلێمانی ، خورماڵ ، هه‌روه‌ها له‌ ده‌ره‌وه‌ی وڵاتیش وه‌ك وڵاتی عه‌ره‌بستانی سعودیه‌و لیبیاو سوریه‌و توركیا ، وه‌شاخه‌كانی هه‌وراماناتیش شاهیدی بۆ مامۆستا ده‌ده‌ن كه‌ له‌ وشكه‌ ناوو كه‌ره‌جاڵ و یاڵانپێ و سه‌رجه‌م باره‌گاكانی بزووتنه‌وه‌ی ئیسلامیی له‌ شاخ و له‌شار بۆ نووسینی ته‌فسیری رامان ، گرنگ ئه‌وه‌یه‌ كه‌ مامۆستا توانی به‌سه‌ر ئه‌و هه‌موو كێشانه‌ی كه‌هاته‌ رێی زاڵ ببێ و سه‌ركه‌وتوبێت ، له‌ هه‌مووی گرنگ تر ئه‌وه‌یه‌ وه‌ك سه‌ید قوتب ده‌ڵێ : ده‌بێت له‌ جموجوڵ و حه‌ره‌كه‌تداَ فیقه دروست ببێت نه‌ك به‌ پێچه‌وانه‌وه‌ ، ته‌فسیره‌كه‌ی مامۆستا مه‌لا ئه‌حمه‌دیش به‌شه‌كانی بیرباوه‌ری ئیسلامیی و ئه‌سماو سیفات و زۆرێك له‌ ئه‌حكامی فیقهی له‌خۆ گرتووه‌و له‌و كه‌ش و بارودۆخه‌دا نووسراوه‌‌ ، سوپاسی بێ پایان بۆ ئه‌و خوایه‌ی كه‌ توانرا ئه‌و به‌رهه‌مه‌ی مامۆستا بڵاو بكرێته‌وه‌و ئێستا له‌ كتێبخانه‌كانی كوردستاندا وه‌ده‌ست ده‌كه‌وێت .. لێره‌وه‌ سوپاس و پێزانینیی خۆمان ئاراسته‌ی ئه‌و برا به‌رێزه‌ ده‌كه‌ین كه‌ توانی برێك له‌ ئه‌ركی چاپی رامان بگرێته‌ ئه‌ستۆ ،‌ خوای گه‌وره‌ پاداشتی خێری بداته‌وه‌ ..